Муниципальное бюджетное общеобразовательное учреждение "Кытанахская средняя общеобразовательная школа им. В.С. Яковлева - Далана"
Хайыһар
О5о эт – хаан өттүнэн сайдыылаах, чэгиэн- чэбдик буола улаатарыгар, бириэмэтин сатаан толору туһана үөрэнэригэр, бэрээдэктээх буоларыгар олоҕор бастакы укулааты спорт чиҥник уурар. Спорт киэҥ эйгэтэ бу соругун биһиги оскуолабытыгар араас хайысханан үлэлээн кэлбит спортивнай секциялар буолаллар. Олортон саамай уһуннук үлэлээбит уонна билигин да өссө үлэтин кэҥэтэн кыракый нэһилиэк спортивнай секциятыттан Чурапчытааҕы оҕо спортивнай оскуолатын филиала, быйылгыттан Алданнааҕы республиканскай оҕо спортивнай оскуолатын филиалын быһыытынан үлэлии олорор хайыһар секцията буолар. Бу секцияҕа дьарыктаммыт оҕолортон билигин республиканы салайсар, оҕону иитии эйгэтигэр бэйэлэрэ туспа суоллаах-иистээх учууталлар, тренердэр, производство чулуу үлэһиттэрэ иитиллэн – такайыллан тахсыбыттара. Республикаларын, улуустарын, нэһилиэктэрин, оскуолаларын аатын билигин да спорт туонатыгар ааттата сылдьаллар.
Попов Иван Николаевич – ССРС спордун маастарыгар кандидат, республика биллэр хайыһардьыта, Саха АССР үтүөлээх тренера, ССРС физическэй культураҕа туйгуна, “Саха АССР физкультура уонна спорт сайдыытыгар кылаатын иһин” Бочуотунай знак хаһаайына, “Урожай” ДСО Бочуоттаах чилиэнэ, Чурапчы улууһун уонна Кытаанах нэһилиэгин Бочуоттаах олохтооҕо, Арыылаах нэһилиэгин ытык киһитэ. Тренер быһыытынан 1968 сылтан 1991 сс. үлэлээбитэ. Хайыһар курдук ыарахан көрүҥҥэ уонунан маастарга кандидат, сүүһүнэн 1-кы разрядтаах спортсменнар иитиллибиттэрэ. Кытаанах оскуолатын хамаандата оройуон чиэһин республика күрэхтэһиитигэр элбэхтик көмүскээбитэ. Саха АССР Х кыһыҥҥы Спартакиадатыгар кыайыылааҕынан буолбуттара, Саха АССР “Урожай” обществотын күрэхтэһиитигэр 5 төгүл субуруччу бастаабыттара.
Терютин Алексей Николаевич – СР үөрэҕириитин туйгуна, республикатааҕы “Урожай” ДСО чемпиона, 18 сыл устата хайыһар, сүүрүү тренеринэн үлэлээтэ.
Хайыһар секциятын иитиллээччилэриттэн барыта 72 разрядник иитиллэн тахсыбыта, ол иһигэр бастакы юношескай – 15, иккис юношескай – 15, үһүс юношескай – 20, бастакы спортивнай – 4, иккис спортивнай – 6, үһүс спортивнай – 10.
